که د ځان هوسایی غواړی د کمال زیور پیدا کړه معرفت سره آشنا شه د عرفان جوهر پیدا کړه
شام مدام لوړی ژوری د کمال له پسی غواړه د نسیم په دودی ځوانه په چمن گذر پیدا کړه
بی هنره به څوک څه کا که قارون په شانی موړ وی ته موسی د زمانی شه د غنا گوهر پیدا کړه
بی هنره که شوی پاتی تل به رغړی په ایرو کی که پرواز غواړی کیهان ته د هما وزر پیدا کړه
نن چه گورم هری خوا ته بحر و بر خلکو تسخیر کړل دا د علم برکت دی ته هم دا هنر پیدا کړه
علم ښه دی د زړه سره خدای دی و ساته له جهله خلک وختل قمر ته ځیر شه ښه رهبر پیدا کړه
علم داسی لوی نعمت دی که و چا ته په نصیب شی شپه او ورځ به یی اختر وی ته هم دا اختر پیدا کړه
د نیکانو سره ژوند تل رهبری د علم بویه که هوښیار یی ای پښتونه دغه خیال په سر پیدا کړه
د قاضی د خولی خبری مرغلری دی که پوه شی ورته زړه په سترگو گوره ځان ته دا بصر پیدا کړه